सहकारमहर्षी भाऊसाहेब थोरात सहकारी साखर कारखान्याचा ऊस गळीत हंगामाचा शुभारंभ

सहकारमहर्षी भाऊसाहेब थोरात सहकारी साखर कारखान्याचा 58 वा गळीत हंगाम नुकताच सुरू झाला. या प्रसंगी आयोजित कार्यक्रमात आमदार बाळासाहेब थोरात यांनी कारखान्याच्या योगदानावर भाष्य केले. ते म्हणाले की, सहकारी साखर कारखान्याच्या माध्यमातून शेतकरी, व्यापारी आणि ऊस उत्पादक यांच्या जीवनात समृद्धी येत आहे. या कारखान्याने तालुक्याच्या आर्थिक विकासातही महत्त्वपूर्ण भूमिका बजावली आहे. त्यांनी ऊस उत्पादकांच्या कष्टांची आणि सहकारी संस्थांच्या योगदानाची प्रशंसा करत पुढील वाटचालीसाठी सर्वांना शुभेच्छा दिल्या.

या कार्यक्रमात माजी आमदार डॉ. सुधीर तांबे, कांचन थोरात, चेअरमन बाबा ओहोळ, रणजीतसिंह देशमुख, डॉ. जयभी थोरात, सुधाकर जोशी, संतोष हासे, रामहरी कातोरे, नवनाथ आरगडे, राजेंद्र गुंजाळ, सुहास आहेर आणि कार्यकारी संचालक जगन्नाथ घुगरकर यांच्यासह विविध मान्यवर उपस्थित होते. कार्यक्रमाचे उद्घाटन करताना आमदार थोरात यांनी सहकारमहर्षी भाऊसाहेब थोरात यांच्या आदर्श शिस्तीवर या कारखान्याची वाटचाल सुरू असल्याचे सांगितले. त्यांनी नमूद केले की, या संस्थेने सर्वसामान्य माणसाच्या जीवनात आनंद निर्माण करण्यासाठी मोलाचे योगदान दिले आहे.

यावर्षी चांगला पाऊस झाल्याने आर्थिक वर्षात शेतकऱ्यांना लाभ होईल, अशी अपेक्षा व्यक्त करत आमदार थोरात यांनी ऊस गाळपासाठी सर्वांनी एकत्रितपणे काम करण्याचे आवाहन केले. कारखान्याचा हंगाम यशस्वी होऊन ऊस उत्पादकांच्या जीवनात समृद्धी येईल, अशी आशा त्यांनी व्यक्त केली. ऊस उत्पादकांसह कारखान्यावरील कामगार, अधिकारी, तसेच कार्यक्षेत्राबाहेरील उत्पादक यांच्यावरही मोठा विश्वास आहे, असे थोरात यांनी सांगितले.

कार्यक्रमात माजी आमदार डॉ. सुधीर तांबे यांनी महाराष्ट्रातील सहकार चळवळीचे योगदान अधोरेखित केले. त्यांनी सांगितले की, भाऊसाहेब थोरात सहकारी साखर कारखान्याने केवळ राज्यातच नव्हे तर देशभरात सहकार क्षेत्रात मार्गदर्शक कार्य केले आहे. यावेळी चेअरमन बाबा ओहोळ यांनी सर्व विभाग प्रमुख व कामगारांना हंगाम यशस्वी करण्यासाठी पूर्ण कार्यक्षमतेने काम करण्याचे आवाहन केले. कार्यक्रमाचे प्रास्ताविक कार्यकारी संचालक जगन्नाथ घुगरकर यांनी केले, सूत्रसंचालन नामदेव कहांडळ यांनी केले तर व्हा. चेअरमन संतोष हासे यांनी आभार मानले.