धार्मिक भावना दुखावल्याच्या प्रकरणी सराला बेट येथील मठाधिपती रामगिरी महाराज यांच्यावर गुन्हा दाखल

 सराला बेट येथील गंगागिरी महाराज मठाचे मठाधिपती महंत रामगिरी महाराज यांच्यावर, मुस्लिम धर्माचे प्रेषित मोहम्मद पैगंबर यांच्याबाबत कीर्तना मधून आक्षेपार्ह विधान केल्याच्या आरोपावरून, संगमनेर शहर पोलीस ठाण्यात गुन्हा दाखल झाला आहे. ही घटना नाशिक जिल्ह्यातल्या सिन्नर तालुक्यातील पंचाळे या गावी घडल्याने, संगमनेर पोलिसांनी पुढील तपासासाठी गुन्हा सिन्नर पोलिसांकडे वर्ग केला आहे.

सुमारे दोनशे वर्षांची परंपरा असलेल्या रामगिरी महाराजांच्या वार्षिक सप्ताह पंचाळे या गावी सध्या चालू असून, या दरम्यान महाराजांनी वरील वक्तव्य केल्याचे सांगितले जाते. या वक्तव्याचा व्हिडिओ समाज माध्यमांमध्ये प्रसारित झाला आणि व्हॉट्सॲपवर हा व्हिडिओ पाहिल्यानंतर मुस्लिम समाजात तीव्र प्रतिक्रिया उमटल्या. वादग्रस्त विधानाबाबत महंतांचा निषेध करत, गुन्हा दाखल करण्याच्या मागणीसाठी मध्यरात्रीनंतर शहरातील तीन बत्ती चौकात मुस्लिम समुदाय जमला होता. जमावाने जोरदार घोषणाबाजी करत महामार्गही रोखून धरला. याची माहिती मिळताच पोलीस घटनास्थळी दाखल झाले आणि उपविभागीय पोलीस अधिकारी सोमनाथ वाघचौरे व इतरांनी जमावाला शांत करण्याचा प्रयत्न केला. पोलिसांनी याआधी वैजापूर व येवला येथे याबाबत गुन्हे दाखल झाल्याची माहिती दिली, परंतु जमाव शांत होण्याच्या मनःस्थितीत नव्हता. अखेर अहमद रझा युनूस शेख यांनी दिलेल्या फिर्यादीवरून संगमनेर शहर पोलीस ठाण्यात महंतांवर धार्मिक भावना दुखावणारे विधान केल्याबाबत गुन्हा दाखल झाला आहे.

(जाहिरातीसाठी  aaplsangamnerr@gmail.com)