बाह्य शक्तींना रोखा त्यांना त्यांची जागा दाखवुन द्या : डॉ. जयश्री थोरात

संगमनेर तालुका युवा काँग्रेसच्या अध्यक्षा डॉ. जयश्री थोरात यांच्या नेतृत्वाखाली युवकांची भव्य जनसंवाद यात्रा सुरू झाली असून, या यात्रेचे विविध गावांमध्ये उत्साहाने स्वागत केले जात आहे. पेमगिरी येथील ऐतिहासिक शहागडावरून सुरुवात झालेली ही यात्रा धांदरफळ, निमगाव बुद्रुक, खाडगाव, नीमज सांगवी, चंदनापुरी, झोळे, सावरगाव तळ या गावांमध्ये उत्साहात पारंपारिक पद्धतीने साजरी होत आहे. या यात्रेमुळे युवकांमध्ये नवीन उत्साह निर्माण झाला आहे. जवळपास दोन हजार युवक काँग्रेसचे पदाधिकारी या यात्रेत सहभागी झाले असून, प्रत्येक गावातील युवकांशी संवाद साधण्यात येत आहे. ढोल-ताशांच्या गजरात आणि फुलांची उधळण करून यात्रेचे स्वागत होत आहे, तरुणाईबरोबरच ज्येष्ठ नागरिक आणि महिलांचीही मोठी उपस्थिती आहे.

यात्रेच्या सावरगाव तळ येथील सभेत बोलताना डॉ. जयश्री थोरात यांनी सांगितले की, आमदार बाळासाहेब थोरात यांच्या अथक प्रयत्नांमुळे संगमनेर तालुक्याचा विकास झालेला आहे. त्यांनी निळवंडे धरण आणि कालव्यांचे काम पूर्ण करून तालुक्याला दुष्काळमुक्त केले आहे. याशिवाय तालुक्यातील शेती, शिक्षण, सहकार आणि आर्थिक क्षेत्रात मोठी प्रगती झाली आहे, जी राज्यभर दिशादर्शक ठरली आहे. परंतु, काही बाह्य शक्तींना तालुक्याचा हा विकास पाहवत नाही, आणि ते या प्रगतीला रोखण्याचा प्रयत्न करत आहेत. अशा प्रवृत्तींना एकजुटीने परास्त करणे आवश्यक आहे. संगमनेर तालुका हा आमदार बाळासाहेब थोरात यांचा बालेकिल्ला असून, येथे शेतकरी, व्यापारी, विद्यार्थी आणि सर्वसामान्य नागरिक सुखाने नांदत आहेत. या शांततेत ढवळाढवळ करण्याचा प्रयत्न होणार असून, बाहेरील शक्ती आपला विकास थांबवण्यासाठी हल्ले करतील, परंतु आपण त्यांना थांबवायला तयार असले पाहिजे.

डॉ. थोरात यांनी विरोधकांवरही टीका केली. त्यांनी सांगितले की, विरोधकांकडे कोणतेही मुद्दे नाहीत, त्यांना तालुक्याच्या समस्या माहित नाहीत, आणि आता निवडणुकीच्या तोंडावर खोटे बोलणारे लोक येणार आहेत. अशा व्यक्तींना वेळीच त्यांची जागा दाखवण्याचे आवाहन त्यांनी केले. या यात्रेत काँग्रेस, युवक काँग्रेस आणि इतर सेलचे पदाधिकारी मोठ्या संख्येने सहभागी झाले आहेत, ज्यामध्ये महिलांचेही प्रमुख योगदान आहे.

युवा संवाद यात्रेचा उद्देश म्हणजे तालुक्याच्या विकासाला चालना देत, लोकांच्या समस्या जाणून घेऊन त्यावर उपाययोजना करण्याचा आहे. डॉ. जयश्री थोरात यांनी सांगितले की, आमदार बाळासाहेब थोरात यांनी तालुक्याला सुसंस्कृत राजकारण आणि सर्वधर्मसमभावाची परंपरा दिली आहे, आणि या परंपरेला पुढे नेण्यासाठी ही यात्रा उपयुक्त ठरेल. तालुक्यातील प्रगतीचे कार्य निरंतर सुरू राहण्यासाठी युवकांचे योगदान महत्त्वाचे असून, हा संवाद प्रवास विकासाच्या दिशेने एक पाऊल आहे.