बदलापूर घटनेच्या निषेधार्थ संगमनेर शिवसेनेचं निषेध आंदोलन: लाडक्या बहिणींना पैसे नको, सुरक्षा द्या

 बदलापूर येथील अत्याचार प्रकरणाचा राज्यभर निषेध सुरू असताना संगमनेरमध्येही शिवसेना आणि शिवसेनेच्या महिला आघाडीच्या वतीने रस्त्यावर उतरून, 'लाडक्या बहिणींना पैसे नको, सुरक्षा द्या' अशा घोषणा देत राज्याच्या गृह खात्याचा तीव्र निषेध करण्यात आला. महिला संपर्कप्रमुख बेबीताई लांडगे, विधानसभा संपर्कप्रमुख सूर्यकांत शिंदे यांच्या मार्गदर्शनाखाली हे आंदोलन बुधवारी करण्यात आले. आंदोलकांनी बदलापूर अमानवीय घटनेचा निषेध करत नराधम आरोपीला फाशीची शिक्षा देण्याची मागणी केली. तसेच पीडितांना न्याय देण्यास विलंब करणाऱ्या गृह खात्याचा देखील निषेध करण्यात आला. 

राज्याचे उपमुख्यमंत्री आणि गृहमंत्री देवेंद्र फडणवीस यांचा कार्यकाळ अपयशी ठरल्याचा आरोप करत, आंदोलकांनी कोपर्डी, नवी मुंबई, बदलापूर अशा विविध अमानवीय घटनांचा उल्लेख केला. यावेळी पोलिसांनी तक्रार नोंदवण्यात दिरंगाई का केली, तसेच आंदोलनावर लाठीचार्ज का करण्यात आला याबाबत आंदोलकांनी अनेक प्रश्न उपस्थित केले. बदलापूर प्रकरणासह राज्यातील अन्य अमानवीय घटनांमध्ये राजकीय दबाव जाणवत असल्याचे सांगून, शिवसेनेचे माजी शहर प्रमुख अमर कतारी यांनी उपमुख्यमंत्री देवेंद्र फडणवीस यांच्या राजीनाम्याची मागणी केली. यावेळी महिला आघाडीच्या तालुकाप्रमुख शितल हासे, उपजिल्हाप्रमुख आशा केदारी, शहर प्रमुख संगीता गायकवाड आणि इतर पदाधिकाऱ्यांनी आपल्या मागण्यांचे निवेदन पोलिसांना दिले. या आंदोलनात शिवसेनेचे माजी शहरप्रमुख अमर कतारी, युवा सेनेचे जिल्हाप्रमुख अमित चव्हाण, तसेच अनेक शिवसैनिक सहभागी झाले होते.